Scrîjadjes / Littérature
Tècse da Joseph Calozet (Nauwin.ne) su one fièsse loméye “fé l’ cok” à l’ difin dè l’ saîson dès travaus d’ èsté à l’ cinse / Texte de Joseph Calozet (Awenne) à propos d’une fête (litt. ‘faire le coq’) à la fin de la saison des travaux estivaux à la ferme
Joseph Calozet
On fêt l’ cok à l’ cinse
Qwinze djoûs â long, l‘ solo a toké tot fant maweri lès-avon.nes, tot fant souwer lès djâbes èt lès dîhês ; lès-ovrîs d’ campagne ni s’ ont r’pwèsé qui l‘ dîmègne ; lès-ovrâves djoûs, on-z-a dâré d’vins lès tchamps ; on-z-a loyî à fwèce ; on-z-a-st-atèlé lès qwate tchivâs dè l’ cinse â bleû tchâr d’ awous’. C’ èst Zidôre qui mon.ne, Louwis èmonte lès djâbes avou s’ fotche, Colas qu’ ètèsse lès tchèrêyes èt Pitit qui sère li mècanike. Lès strins èt lès pautes hiletèt télemint qu’ lès grins sont bin sètchs, èt lès dj’vâs mohetèt télemint qu’ lès tahons brûtèt â solo. Li heûre èt l‘ bèraudî sont plins à make di djâbes ètèssêyes : on-z-î a hèré l‘ wassin, li wèdje èt l’ frumint à costé d’ on moncê d’foûre èt d’ on hopê d’ fôrèdje. Oûy l’ awous’ discrèh ; i n’ dimane pus qu’ lès-avonnes à tchèrî èt l’ cinsî a rèsou dè fé ‘ne môye dè long dè l’ Masblète, dizos Warmont. Louwis è-st-adrèt’ po l’ monter, il a stindou on rond d’ fagots â mitan dès steûles èt, eune a eune, lès tchèrêyes d’ avon.ne s’ ont v’nou ètèsser lét par lét, pautes â-d’vins. Li rond s’ a-st-alârdji di p’tit à p’tit, montant disqu’à hôteûr dè l’ tièsse dè grand bayârd, li gros roncin dè l’ cinse ; pwis Louwis a rastreûti lès léts onk à onk tot toûrnant po-z-ariver à ‘ne bètchète.
Divant l’ nut’, lu èt l’ cinsî ont covrou l’ môye avou dès djâbes di wassin. Qwand ç’ a stu fêt, Louwis a brêt â Pitit qu’ i lî vâye côper dè long dè rèw on cohê d’ plope, èt vo-le-là monté à l’ fène copète dè l’ môye po-z-î planter l’ brantche. Di là-hôt, i brêt : “Volà ! I fât bin ça po l’ cok, èdon, cinsî ? Awè, rèspond Colas ; asteûre, nos l’ îrans ramouyî à l’ cinse”. Èt tote li binde, djoyeûse come à l’ fièsse, a trivièrsé lès steûles tot r’wêtant l’ môye d’ â lon, po vèy si èlle èstéve dreûte, li môye qui r’son.néve â toûrnikèt qui s’ vint drèssî divant l’ èglîje po l’ fièsse dè viyèdje.
“Cinserèsse, di-st-i Colas, tot rintrant, nos-alans fé l’ cok ! Alez nos qwèri è l’ câve ine botèye di pèkèt bin fris’ : nos beûrans à l’ santè da Louwis qu’ a v’nou soyî nos d’vêrs èt qu’ nos-a fêt ‘ne si bèle môye.”
(à complèter / à compléter)