MUNUSÎ / SCRINÎ

Maurice Neuville, in : Sovenances d’ ayîr…, Sint-Sèrwaîs, 1979, p.46-47

Munuserîye

Travayî l’bwès, ç’n’ èst nin po rîre,

I faut bin conêche sès-ostèyes

Qu’ seûyenuche d’ asteûre ou bin d’a yîr

Is sont d’ ayeûrs di bon consèy.

Rabot, varlope, quausu dès fréres

Sovint d’acôrd avou l’ cisia

Faîyenut dès clignètes à l’ èkére

Po qu’ tote l’ afaîre fuche di nivia.

Li p’tit vaurlèt, d’ on-aîr canaye,

Tind dins s’ brès d’ fiêr li bokèt d’bwès

Jamaîs, i n’ a r’çû one mèdaye

Por on ovradje vindu au Rwè.

Tèréres èt mètches sont po lès traus,

Èles sont fines sotes di leûs pwârtéyes,

Èlle ont tortotes leû numèrô

Sûvant l’ grocheû di leûs-intréyes.

Li sôliète hagne di tos sès dints

Tot r’waîtant l’ traçadje do trussekin,

Li r’finderèce, lèye, pus grandiveûse,

Ascauche si vôye come one voleûse.

Mins lès mèyeûs dès-abonés,

C’èst l ‘maurtia, lès vis’ èt lès claus,

Li fwate ètricwèsse rauye lès chalés

Moussis d’ truviès dins on mwaîs trau.

Po divenu on fèl munusier,

Faut dès-ostèyes èt one bone tièsse,

Travayî l’ bwès c’èst rachoner

L ‘ârt do bia avou l’ adrèsse