BWÈJELÎ

Li bwèhelî, in: La Wallonne, 2, 2011, p.3-4

D’après Léon Colson du Musée du Folklore de Marchin

I-n-a co pus d’ cinkante ans, bwèhelî èsteût-st-on deûr mèstî, on-z-ovréve è bwès. È l’ iviér, coula d’mandéve dès-omes vigreûs n’ ayant nin sogne dè l‘  frudeûr ni dè l‘ souweûr. Po s’ mète à houte, is-avît 1′ flâne, c’ èsteût on teûtê qu’ is fît avou dès fètchîres, qu’ is trovît so plèce ou dè strin d’ wassin so on câde di bwès. Li flahe èsteût ratenowe so on costé avou dès fotches. C’ èst d’zos 1′ flahe qui lès bwèhelîs s’ mètît à houte dè l’ plêve ou dè l’ nîvaye. Qwand is-èstît trop lon po poleûr rintrer è leû mohone tos lès djoûs, i fît ‘ne houbète avou dès cohes.

Lès bwèhelîs n’ èstît nin todi dès-omes di mèstî. Bin sovint, is-ovrît tote l’ an.nêye: l’ osté, is côpît dès sapins, è l’ iviér, dès-âbes à fouyes. Is côpît lès gros-âbes à l‘ cougnêye à ras‘ di tére èt min.me dizos qwand l’ âbe valéve li côp (insi on djèyî). L’ ovrèdje èsteût di sâhon et c’ è-st-insi qu’ lès maçons, qui n’ ovrît nin qwand i djaléve, vinît d’ner on côp d’ min è l’ iviér. Lès p’tits cinsîs v’nît ossi d’ner on côp d’ min. Tos cès-ovrîs-ci si d’vît savu chèrvi d’ leûs deûs mins, pace qui avou 1′ cougnêye, on côpe ine fèye à hintche, ine fèye à dreûte. On markéve lès côpes avou dès lahes qu’ on plantéve chal èt là.

I-n-a treûs sôrts d’ ovrèdje po l’ bwèhelî :

– dè l‘ rasse

– dè l‘ rasse dizos 1′ hôte fleûr.

Chal, li rasse èsteût côpêye divant d‘ racléri lès grands-âbes. Tot-avâ, lès strouks ni polît nin avu pus d’ dî centimètes èt d’vît-èsse côpés di lèvê po n’ nin ahèssî lès pates dès dj’vâs. On n’ si poléve nin chèrvi dè l’ sôye po qu’ lès plâyes riprindahîse mîs.

-dè l‘ hôte fleur.

È bwès, rin n’ si pièrdéve. Li gros bwès ènn’ aléve as sôyerèyes. Li hwèce, qu’ on prindéve avou l’ pèleû, èsteût mètowe in fas po lès tènerèyes. Lès sclats èstît vindous, à l‘ banse, po-z-èsprinde li feû. Lès tièsses èstît r’cèpêyes à l‘ ricèperèce ou à l‘ sôyelète po l’ tchâfèdje ou lès houyîres. Lès gros bokèts èstît côpés à on mète èt mètou in tas po fé dès stères ou dès cwèdes. Lès p’tits bwès chèrvît à fé dè tchèrbon di strivê divins lès fådes qu’ ont lèyî dès rôyes  qu’ on pout co veûy asteûre divins lès campagnes wice qu’ i-n-aveût dès bwès d’vins l’ timps.

Après tot coula, i n’ dimoréve pus qui l’ lègne po fé dès moussâdes.

Lès rasses dinît co lès bwès po lès houyîres. Avou lès rins d’ bèyoles, on fève dès ramons. Qwand âs mantches d’ ustèyes, on ‘lzès féve avou l’ bwès d‘ frågne ou d‘ colougnî. On s’ chèrvéve di tchèrbon di strivê d’ aunê po fé dè l’ poûre qu’ on-èvoyîve à l‘ poûrerèye di Lomegné.

Po fé leûs-ovrèdjes, lès bwèhelîs avît co dès-ôtès-ustèyes:

– li fièrmint èt l’ fièrmint à bûse qu’ aveût on long mantche èt qui chèrvéve à disgadjî lès pîds dès-âbes à côper;

– li tire-diâle qui chèrvéve a miner l’ âbe wice qui d’véve toumer;

– li bâdèt d’ ramonî po fé lès balèts;

– li gade po t’ni lès bwès qu’on côpe;

– li grand bâdèt po fé lès fahènes et lès cohètes di vèloûde;

– li blokê qu‘ on côpe lès cohes dissus;

– li bèrwète à civîre po l’ transport d’ ine cwène à l’ ôte;

Èt lès p’titès-ustèyes po-z-intriteni lès-ôtes :

– li pîre à sin.mî;

– li lème à treûs cwèsses;

– li picète à avoyî;

– li centimète.

Ine fahène féve à pô près on mète di long èt on mète di toûr. On ‘lzès loyîve avou deûs hârts di neûhî ou d’ sâ. On s’ chèrvéve dè pôce po fé ‘ne blouke, ça s’ louméve “pôcî ‘ne hârt”. Li fi d’ årka a pris 1′ plèce dè hârt. Qwand l’ loyin rastrindéve li fahène, i faléve fé ‘ne blouke èt on spiyîve li fi d’ ârka sins tricwèsse.