BOLÈDJÎ

Maurice Neuville, in : Sovenances d’ ayîr…, Sint-Sèrwaîs, 1979

(p.41) Li bolèdjî

Si vos t’noz à l’ tchaleûr

Mètoz-vos bolèdjî,

Vos-auroz vos-ûmeûrs

Rèstchauféyes au gosî.

Fini lès prustichadjes

Qui naujichin.n’ lès brès,

One machine faît l’ ovradje

C’ èst dèdjà one saqwè.

Tchaufer l’ for : on boton

Èt l’ afaîre è-st-èvôye,

Adiè l’ rauve èt l’forgon

Li mèstî gangne dès rôyes.

Li cûjéye è-st-à pont,

One à one, lès platènes

Clignenut l’ oûy au patron

Come lès bèlès mèskènes.

C’ è-st-insi tos lès djôûs,

S’ lèver timpe po l’ ovradje,

Kèkî l’ for au cwârsadje

Èt qui l’ maî dîye bondjoû.

Trop sovint, on rovîye

Lès crayas, lès scrabîyes,

Lès souweûs, lès toûrmints

Po sawè cûre do pwin.