Li Cwarème en Bèljike walone (Le Carême en Belgique wallonne)

Roger Tabareux (An.yéye / Anhée)

 

Tûsadje di Cwarème

 

I m’ arive co sovint do tûsè au vî timps.

Dji r’veu dins mès sovenances one masse di brâvès djins.

Maugrè ostant d’ anéyes, dji n’ rovîye nin leû nom.

I m’ chone qui dj’ lès veu co sôrti foû d’leû maujon.

Do trèvint do Cwarème, falèt lès veûye tortos.

Chakin fieut one saqwè lès quarante djoûs d’ asto.

Li Zande ripindeut s’ pupe, ni djondeut pus s’ pèkèt,

Mélanîye fieut s’ possibe po n’ nin s’ disguèrmètè.

 

Èt à l’pèneûse samwin.ne, lès clotches ni sonint pus.

Nos djouwins do l’ rakète po qu’ on vègne au salut.

Asteûre, tot ça est iute, lès timps ont bin candji,

Li Cwarème d’ audjoûrdu èst bran.mint pus auji.

 

Nos va falu rastrinde dissus noste amougni

I gn-a rin d’ tél qui ça po nos fè ramwinri.

Nosse pitite fricasséye, deûs canadas pètès

Èt si ça nos gostéye, rostichans on sorèt.

 

Joseph Houziaux

 

Sièrmon d’ Cwarème

 

C’ è-st-à Cwarème, lès djins choûtèt 1′ prédicateûr.

Chake côp qui, dins l’ sièrmon, il ôt li sint priyèsse

Lachi li nom do diâle ou l’ bin l’ ci do Sauveûr,

Li rûsé Ardinwès s’ astampe èt bache li tièsse.

Li salut iute, en-z-è ralant o l’ maujon d’ cure,

Li père l’ atauche : « Poqwè, di-st-i, au nom d’ Satan,

F’yîz 1′ rèvèrince ? Diâle ou Bon Diè, mi, dj’ ènn’ aî d’ cure. »

« Do quéke aurè-dje dandjî ? », rèspond-i l’ payisan ?

 

Georges Smal (Houyèt / Houyet)

 

Cwarème

 

Tot ç’ qui r’djète, qui chime èt qui tchante,

Tot ç’ qui ûle, qui, grûle èt qui braît,

Min.me twè. Colas, èt t’ feume qui s’ vante

Di t’ fé minti po qu’ ça sôye vraî.

Tot ç’ qui florit po l’ djoû dès Paukes,

Èt twè, bièrdjî, ti p’tit bèdot

Qui t’ a sgoselè po t’ fè deûs baubes,

Èt twè, baurbî qu’ a iu bon dos.

Tot ç’ qui faît l’ têre ossi rodjausse,

Tot ç’ qui n’s-astins, tot ç qui nos s’rans,

Lès cias qu’ ont peû, lès cias qu’ ont hausse

Do braîre on djoû d’vant leûs-èfants.

Tos lès pètchis, totes lès misé­res,

Si t’ t’ è sovins, si t’ as rovyi

Qu’ on vinrdi sint, gn-a iu one mére

Qu’ a r’wêti l’ crwès po n’ nin l’ rauyi.

 

Gh(islain) Lefebvre

 

Po fé Cwaréme…

 

Gn-a rin d’ mèyeû qu’ dès parbolèts,*

On plat d’ dicauce  po  lès fins bètchs!

 ! Qu’ dj’ aî bon do m’ è régalé !

Gn-a rin d’ mèyeû qu’ dès parbolèts

S’ on-z-a do sé po lès salés

Èt do bûre po lès rinde mwins’ sètchs.

Gn-a rin d’ mèyeû qu’ dès parbolèts

On plat d’ dicauce po lès fins bètchs.

 

·        parbolèt : pomme de terre cuite à l’eau dans sa pelure.

 

Poqwè-ce qui nos-avans l' Cwarème? (Pourquoi avons-nous le Carême?) (Catherine (...), BrIn.ne-l'-Alieu (Braine-L'Alleud)

                                                                             (in: Wallonia, 18793, p.52-53)