LI FAUMÈNE & CALÈSTIÈNE

LA FAMENNE & CALESTIENNE

li Faumène (la Famenne) (Lèssîve / Lessive)

Lou Pierard, À  Rotchefwârt… quand dj’ asteu p’tit

 

Volà longtimps, quand dj’ asteu p’tit,

Avou papa, sovint l’ djûdi.

Nos n’ alin.n tot nos t’nant pa l’ mwin,

À l’ gâre di V’gnée po prinde li trin,

Nos courin.n rademint à Rotchefwârt,

Po ièsse ruv’nus d’vant qu’ i n’ fiuche nwâr .

Nos passin.n insi noss vèspréye,

Papa d’djeut : «Ça candje lès-idéyes».

 

À Rotchefwârt, quand dj’ asteu gamin,

Li Blanc Caton, dji m’ è sovin,

Satcheut co su s’-t-acordèyon,

D’vant lès-uchs, po totes lès mayons.

Di Dèwin, gripant à Lorète,

Li calote satchîye su l’ anète,

I fieut spiter one bèle tchanson,

Dji m’ arèteu dé l’ Blanc Caton.

Po-z-anoncî lès-ètèremints,

Anna Djaumène pa tos lès timps.

Di l’ sicole mwyène jusqu’à l’ briketrîye

Avou s’ grand mokwè v’neut criyî,

Come èle li fieut po tos les bals,

Do l’ dicauce ou do carnaval,

Bin astampéye dissus l’ pavéye,

Avou s’ sonète, èle fieut s’ toûrnéye.

 

Lambote èt Floûr, li fârmacyin,

Djouwin.n dès toûrs di grimancyins

Is conuchin.n totes lès novèles,

Contin.n lès fauves aus djon.nès bauchèles.

Nos rèscontrin.n Mossieû Houziaux,

Jules Mossiat ou bin l’ pére Thibaut,

Nos crwèjelin.n Bébé su s’ tchèrète,

Li médecin Châle èt Magonète.

 

Po l’ tchau, dj’ alin.n mon Djan Staner,

On soçon come i gn-aveut wêre,

Quand ç’ asteut po k’tayi nos tch’vias,

Mon Armand, on nos fieut pus bias.

Addé l’ tram di Han, Pére Hènin

Ratindeut lès djins po Wèlin,

Lès criyeûs di tos les-hôtèls,

Astin.n à l’ gâre po l’ trin d’ Brussèl.

 

Is n’ sont pus là, tos lès soçons,

Li vî Nihote, li pére Dumont,

Li frére Djâke èt l’ dwèyin Pièltain,

Li maîsse Sion, Lothaire, Halain,

Is n’ sont pus là èt maugrè l’ timps,

D’vant mon Attout, dji r’veu co bin

Li Blanc Caton dissus s’ caîsson,

Quand dj’ asteu p’tit, come ça èst Ion !

Share This
error: Alert: Content is protected !!